‘मेरो गाउँको बुढो पातलो भएपनि बलियो’ – हिसिला यमी

काठमाडौं। असार लागेसँगै देशका विभिन्न स्थानमा रोपाईं भइरहेको छ । आइतबार देशभार धान दिवस मनाइयो । धान दिवसको अवसरमा विभिन्न नेता, कर्मचारी, मन्त्रीदेखि उच्च पदस्थहरु खेतमा पुगेर रोपाईंमा सहभागी बने ।

यस्तै क्रममा पूर्वप्रधानमन्त्री डाक्टर बाबुराम भट्टराईले पनि आफ्नो गृहजिल्ला गोरखा पुगेर रोपाईंमा सहभागी हुनुभएको छ । उहाँले २ घण्टाभन्दा बढी समय खेतमा बिताउनुभएको थियो । खेतमा समय बिताउने क्रममा उहाँ ‘हली’ बन्दै गोरु जोत्नुभयो । यस्तै उहाँले बाउसे बनेर खेत पनि सम्याउनुभएको छ ।

आफूले गरेको क्रियाकलापहरु सामाजिक सञ्जालमार्फत सार्वजनिक गर्ने डाक्टर भट्टराईले यी तस्बिरहरु पनि आफ्नो ट्वीटर, फेसबुक लगायतका सामाजिक सञ्जालमा राख्नुभएको छ । उहाँले गर्नुभएको ट्वीटमा पत्नी एवं नेतृ हिसिला यमीले गज्जबको वाक्य लेख्दै रिट्वीट गर्नुभएको छ ।

डाक्टर भट्टराईको ट्वीटलाई रिट्वीट गर्दै पत्नी यमीले गरेको रिट्वीटमा भनिएको छ, ‘मेरो गाउँको बुढो पातलो भएपनि बलियो : म शहरकी बुढी हट्टाकट्टा देखिए पनि, बलियो उनै छन् !’