फोरजी सेवा संचालनका लागि हुवावेसँग चौधरी ग्रुप सहमत, २५ अर्ब लगानी गर्न विनोद चौधरी तयार

काठमाडौं। चाइनाको हुवावेसँग चौधरी ग्रुपले फोरजी सेवा संचालनका लागि सहमति गरेको छ । चौधरी ग्रुपले हुवावेसँग फोरजी सेवा संचालन गर्न एक सय मिलियन अमेरिकी डलर बराबर रकममा सम्झौता गरेको चौधरी ग्रुपका अधिकारीले जनाएका छन् । अमेरिका र हुवावेबीच द्वन्द्वचर्किरहेको अवस्थामा चौधरी ग्रुपले चिनियाँ कम्पनीसँग मिलेर नेपालमा २५ अर्ब लगानी गर्न लागेको विषयले विश्वको ध्यान तानेको छ।

चौधरी ग्रुपका अध्यक्ष विनोद चौधरीले यो सम्झौता पत्रमा हस्ताक्षर गरेसँगै नेपालभर फेरजी सेवा सजिलै उपलव्ध हुने दावी गरे । चौधरीले अन्तर्राष्ट्रिय सञ्चारमाध्यम टेलिग्राफसँग कुराकानी गर्दै भारतको मोबाइल क्षेत्रमा रिलायन्स कम्पनीले पकड जमाएजस्तै गर नेपालको मोबाइल बजारमा फोरजी सेवामार्फत हलचल नै ल्याउने दावी गरेका छन्।

चौधरीले भनेका छन्, ‘हामीले नेपालमा दुई सय ५० मिलियन डलर खर्च गर्ने लक्ष्य राखेका छौ । हामी फ्रि भ्वाइस सर्भिस पनि दिनेछौं र विशेष गरेर डाटा, अनलाइन पेमेन्ट र अन्य सुविधामा विशेष ध्यान केन्द्रित गर्नेछौं । फोरजी सेवा सञ्चालनका लागि हुवावेले एक सय मिलियन अमेरिकी डलर बराबरका सामाग्री सप्लाई गर्नेछ, जुन पछि फाइभजीमा समेत अपग्रेड गर्न सकिनेछ।

चीनको म्यानुफ्याक्चरसँग मिलेर सिमेन्ट क्षेत्रमा सहकार्य गर्न खोजेको समेत जनाएका छन्। सीजीले पहिले नै नेपालमा ग्रामीण भेगमा लिमिटेड टेलिकम्युनिकेसन सञ्चालन गर्दै आएको छ। चौधरीले अबको चार वर्षभित्र नेपालको टेलिकम बजारमा एक तिहाइ हिस्सा लिने दाबी समेत गरेका छन्।

हुवावेको प्रविधि विश्वभर फाइभजी उपकरणका लागि मुख्य प्रतिस्पर्धी हो। तर अमेरिकाले हुवावेको प्रविधिले सुरक्षामा खतरा पुर्‍याउने भन्दै त्यसलाई बहिष्कार गर्न अन्तर्राष्ट्रियस्तरमा आह्वान गर्दै आएको छ। केही साता अगाडिमात्रै हुवावेसँग रुसले पनि फाइभजी सेवा सुरू गर्ने सम्झौतापत्रमा हस्ताक्षर गरेको थियो।

नेपालको दूरसञ्चार क्षेत्रमा ५१ प्रतिशतको बजार सेयर लिएर हाल नेपाल टेलिकम अग्रस्थानमा छ। त्यसपछि एनसेल र स्मार्ट सेल रहेका छन्। एशियामा चर्चित बनेको चौधरी ग्रुपको चाउचाउ ब्रान्डसँगै ग्रुपले बैंक, दूरसञ्चार व्यवसाय, अटो, रियर स्टेट, होटल लगायतका व्यवसायमा लगानी गरिरहेको छ। साथै भारतको ताज ग्रुपसँगको साझेदारीमा माल्दिभ्समा दुई वटा रिसोर्ट सञ्चालन गरिरहेको छ।