आंशिक मात्रै खोल्ने बैंकहरुको तयारी ; हेर्नुहोस कुन कुन शाखा खुल्छन

काठमाडौं । देशभर पूर्ण लकडाउन हुँदा पनि बैंकहरुले सेवा बन्द गरेनन् । सिमित कर्मचारीहरु राखेर भए पनि सेवा सुचारु नै राखे तर ४ महिना लकडाउनको अवधिमा नदेखिएको बैंकिङ क्षेत्रमा पनि कोरोनाको जोखिम उच्च रहेको स्पष्ट भएको छ ।कोरोना भाइरसको संक्रमणको देशमा कुल २३ हजार ३१० संख्या पुगेको छ र मृतकको संख्या ७९ पुगेको छ । यतिबेला प्रहरीहरुमा नै संक्रमण देखिन थालेपछि जोखिम झन बढेको छ ।

उच्च सुरक्षा सतर्कता अपनाउँदा पनि सोमबार एभरेष्ट बैंकको केन्द्रीय कार्यालयमै कार्यरत २ जना कर्मचारीमा कोरोना संक्रमण देखियो । त्यसपछि बैंकको केन्द्रीय कार्यालय नै सिल गरिएको अवस्था छ । एभरेष्टमामात्रै होइन काठमाडौं उपत्यकाबाहिरका विभन्नि ठाउँहरुमा रहेका बैंकका शाखा कार्यालयहरुमा कार्यरत कर्मचारीहरुमा पनि संक्रमण देखिएको छ ।एनआइशी एशिया बैंक, सिभिल बैंक, ग्लोबल आइएमई बैंक लगायतका बैंकहरुको उपत्यका बाहिरका शाखामा संक्रमण देखिएको छ । सबैभन्दा धेरै भने सिभिल बैंकमा संक्रमण देखिएको बुझिएको छ । सुरक्षा सतर्कता अपनाउदा अपनाउदै पनि संक्रमण देखिएपछि बैंकिङ क्षेत्र थप सजग हुनु पर्ने भन्दै सोमबार बैंकर्स संघका सदस्यहरुबीच छलफल समेत भएको छ ।

सोमबार भएकेा छलफलमा अधिकांशले बैंकका आंशिक शाखामात्रै खोलेर सेवा दिनु पर्ने धारणा राखेका छन् । ‘जोखिम निकै बढेपछि हामीले छलफल गरेका हौं’ एक बैंकका सीईओले भने, ‘अब सम्भवतः एकदुई दिनमै नयाँ निर्णय हुन्छ, हामी सिमित शाखाबाट मात्रै सेवा दिनेछौं ।’

नेपाल राष्ट्र बैंकले जानै पर्ने कर्मचारीलाई बाहेक अरुलाइ घरबाटै काम गराउन निर्देशन दिएको छ । राष्ट्र बैंकको निर्देशन तत्कालै पालना गरिने ति बैंकरले बताए । आफूहरुको चाहाना अनुसार नै केन्द्रीय बैंकको निर्देशन आएकाले सबै पालना हुने उनले बताए ।