नयाँ मन्त्री नियुक्ति आफूसँगकाे सहमतिमा नगरिएको प्रचण्डको भनाइ

प्रधानमन्त्री केपी शर्मा ओलीले पार्टीका कार्यकारी अध्यक्ष पुष्पकमल दाहाल प्रचण्डसँगकाे सहमतिबिना नै मन्त्रिमण्डल पुनर्गठन गरेका छन्।

प्रधानमन्त्री ओलीले रिक्त अर्थ मन्त्रालयमा विष्णु पौडेललाई नियुक्त गरेका छन् भने शहरी विकासमा कृष्णगोपाल श्रेष्ठ र महिला, बालबालिका तथा ज्येष्ठ नागरिक मन्त्रालयमा लीलानाथ श्रेष्ठलाई ल्याएका छन्। महिला मन्त्रालयमा रहेका पार्वत गुरुङ्गलाई रिक्त रहेको सूचना तथा सञ्चार मन्त्रालयको नेतृत्व दिएका छन्।

तर मन्त्रालय र मन्त्री तोक्ने यी विषयमा आफूसँग कुनै सहमति नभएको पार्टीका कार्यकारी अध्यक्ष प्रचण्डको भनाइ छ। ‘मसँग कुनै सहमति लिइएको छैन,’ नेकपाका एक सचिवालय सदस्यले प्रचण्डको भनाई उद्धृत गर्दै भने। प्रधानमन्त्री ओली र प्रचण्डबीच आज बुधबार पनि बालुवाटारमा साढे दुई घण्टा छलफल भएको थियो। मन्त्रिमण्डल पुनर्गठनको विषयमा कुरा भएपनि कुनै सहमति नभएको ती नेताले बताए।

‘आजका नियुक्ति उहाँसँग सहमतिमा गरिएको होइन रहेछ,’ पुनर्गठनबारे समाचार आउनासाथ प्रचण्डलाई सम्पर्क गरेका ती नेताले भने। यसअघि प्रधानमन्त्री ओलीले रिक्त तीन मन्त्रालयमध्ये एकमा पुर्वमाओवादी पक्षलाई पनि समेट्ने वचन दिएका थिए।
रिक्त मन्त्रालयमा जनार्दन शर्मालाई संभावना उच्च रहेको बताइएको थियो। शर्माले गृह वा अर्थ मन्त्रालय आफूले पाउनुपर्ने माग राखेपछि प्रचण्डले प्रधानमन्त्री ओलीलाई यसको निर्णय गर्ने अधिकार दिएको बताइएको थियो।

पछिल्लो स्थायी समितिले गरेको निर्णयको स्प्रिटअनुसार पुनर्गठन भयो कि भएन? भन्ने विषयमा अब छलफल हुने ती नेताले बताए। ‘अहिले दुई अध्यक्षबीचमा सहमति नभई तीन मन्त्री नियुक्त भएका छन्,’ यसबारेमा अब पार्टीको बैठकमा छलफल हुन्छ ती नेताले भने। प्रधानमन्त्री ओलीले सचिवालय सदस्य ईश्वर पोखरेलले नेतृत्व गरिरहेको रक्षा मन्त्रालय खोसेर आँफै राखेका छन्। उनलाई प्रधानमन्त्री तथा मन्त्रिपरिषद् कार्यालयसम्बन्धी मामिला हेर्ने जिम्मेवारी दिइएको छ।

यस्तै महिला, बालबालिका तथा ज्येष्ठ नागरिक मन्त्री रहेका पार्वत गुरुङ्गलाई सञ्चार मन्त्री बनाएर सो मन्त्रालयमा लीलानाथ श्रेष्ठलाई ल्याइएको छ।